音樂劇「熱鬥獅子球」

上星期日，同妹妹去文化中心，睇咗一套音樂劇。實不相瞞，媽媽我比較孤陋寡聞，從來未入過文化中心嘅大劇院。入到去，見到舞台上宏大嘅佈景，現場樂團嘅演奏，我真係「嘩」咗出來。

呢套精彩嘅音樂劇叫「熱鬥獅子球 🦁 Go Lion! Goal!」，由香港數十位本地中學生演出。

劇中講述女子手球隊隊長，同埋醒獅隊隊長，如何從最初嘅磨擦對恃，慢慢互相了解及幫助，最後成功達成各自嘅夢想。

台下有指揮及樂團，即時演奏。澎湃嘅現場音樂，配上舞蹈、歌曲，令我真心欣賞呢班年青表演者，深深感受到佢哋嘅熱誠同努力。加上原創粵語劇本，更加要支持。

音樂劇完結後，導演對觀眾講嘅一句「加油」，令大家特別感觸，全場拍掌。

謝謝劇團、樂團嘅年青人，係現今嘅環境中，為大家送上鼓勵。