親子互動音樂劇

前幾天，睇一套名為《小樹的神奇畫筆》嘅音樂劇。平時睇音樂劇，都係靜靜坐係度睇，但今次有唔同，係互動的。究竟係點樣互動呢 🤨 ?

先簡介故事，🌴小樹同一般小朋友一樣，好鍾意畫畫，不過淨係鍾意畫普通嘅大樹，小樹去到蛋糕姐姐嘅畫室，姐姐用各種顏色、方法、畫具，鼓勵小樹多方面創作，突破自己，畫出唔同種類嘅樹 🌴 。

音樂劇中，以著名畫家嘅作品，介紹唔同嘅畫畫方式，例如梵高嘅向日葵畫；Suerat 嘅點彩畫；Mondrian 嘅幾何圖形畫。令小朋友知道，畫畫唔係單單用線條，原來仲有其他方法可以構成一幅美麗嘅圖畫。

演員姐姐會不斷問問題，希望得到在場小朋友嘅回應，小朋友暢所欲言，大大聲回答。仲會派顏色水筆、卡紙、小電筒，引導小朋友一齊繪畫 🖍。 除咗唱歌同跳舞，仲介紹咗樂器，分別係牧童笛、長笛、非洲其中一款民族笛，令小朋友認識更多，我身為媽媽都大開眼界 👀，第一次見到非洲那枝笛，吹出來是鴨鴨叫的聲音，好特別🦆。

呢套音樂劇，係由 caketimemusic 演出，佢哋嘅宗旨，係希望透過互動音樂劇，令小朋友認識藝術及音樂之餘，亦能得到全面發展，唔再係坐定定去聽書學習，而係勇於表達，用說話表達感想，有意見就要發聲 📣。 親身參與活動，亦令學習更有趣，印象更深。另外，家長一齊參與，亦增進親子感情。 
來緊劇團嘅新節目將會係十月嘅《🐒 孫悟空玩轉中樂團》，以《西遊記》故事改編，配上現場中樂演出。