Friso 美素佳兒 產前實習坊

以前陀第一胎，因為懶，一個產前講座都冇報。第二胎，因為湊住大仔，又冇時間去講座。

到今胎，兩個小朋友大了，時間多了，就報幾場講座聽吓，update 一下自己嘅育兒知識，話晒對上果胎已經 6年前，要溫故知新。

今日，我參加了 Friso 美素佳兒產前實習坊，於金域假日酒店舉行。實習坊/工作坊 唔同普通純講座，唔會排排坐係度齋聽。入到會場，全部都係圓枱，一圍圍咁坐，每張枱都準備了幾個 BB 公仔、紗巾、薄紗包被、綿花，比準爸爸媽媽實習。

講座開始，先由營養師分享懷孕飲食資訊，例如講講有咩食物會令血糖上升太快，有咩食物多 DHA 等等。期間，亦有工作人員派媽咪奶粉比大家試飲。

講解途中，有互動環節，大家可以用電話登入網頁，參與即時投票、問答遊戲，仲可以用手機發問問題，營養師會即時睇到，即時解答。多咗互動，爸爸媽媽就唔會聽到瞌眼瞓啦。

接住，就由護士教大家點樣幫 BB 洗頭、沖涼、換片、掃風、洗面等等，準爸媽就用面前嘅 BB 實習一番。對於我同老公，難道不大，好彩仍然有 6年前嘅記憶。在場有好多第一次當爸媽的，大家都好用心聽講同練習呢 。多練習，就自然快上手，各位加油呀！

最後，臨走時就係禮物時間，美素佳兒送出每位媽媽一個三角枕、育兒書、媽咪奶粉試用裝。我最鍾意個三角枕，尤其宜家肚肚愈來愈大，側睡時非常需要枕頭支撐。第日細佬出世又可以比佢用。老公話仲可以比佢用來踱腳。

來緊9月，我仲會去其他講座，實行最後衝刺。

「壹家人× Eye Kitchen」奶皇月餅班

就快中秋節，唔知大家有冇自己整月餅呢？以前未結婚時，我就自己出去學整冰皮，學完仲好有恆心咁返屋企再整，當時我爸爸陪我癲，係屋企跟我學整。

轉眼間10幾年後，有小朋友了，就去玩親子班啦。

早前，帶囡囡參加「壹家人× Eye Kitchen」奶皇月餅班。妹妹第一次玩呢類烹飪班，前一晚已經好興奮，不斷問幾時可以出去呀。

月餅班多不勝數，我揀呢個班嘅原因，首先係因為整兔仔造型，好可愛，小朋友一定喜歡。第二，現實一點，係因為價錢合理，$420，比起外面好多都要接近 $500呢！最後一個主要原因，係 Eye Kitchen 導師 Elizabeth 主張用健康材料烹調，所以今次嘅奶黃月餅，選材都係天然無添加：

奶黃餡係用鮮雞蛋 + 天然雲呢拿油煮成，冇奶粉、冇色素、冇香精，所以製成品嘅顏色會比較淡。糖方面，會用有機甜菊糖，唔會影響血糖水平，宜家好多健康菜式，都會用呢款調味材料。

到達太子 Eye Kitchen，工具和圍裙已經準備好在枱上了，個個小朋友都好心急動手。導師先將每個程序都清楚講解同示範，仲好風趣幽默，小朋友唔會聽到悶。

大部分工序都係囡囡自己一手包辦，我淨係幫佢比較難嘅步驟~~包餡。

首先將奶黃餡分成六等分，然後搓圓，接著混和面粉及牛油，搓皮，頭幾個步驟簡單，我可以坐在一邊看，囡囡仲話自己攪掂，唔比我插手。直到包餡時，技巧難少少，需要我幫一個幫了。

做好兔仔造型，就可以入爐。每焗幾分鐘，就要攞出來攤一攤，再焗。大約半小時，出爐了，好可愛呀，成爐都係兔仔。

返到屋企，急不及待試味先。好好食呀！

World of Eric Carle 童心童閱

暑假過了大半，諗緊仲可以帶兩個小朋友去邊度玩呢？天氣日日都焗熱，有時又突然連續落雨幾日，好似搵 D 室內活動比較好。

今次，我同對囝囝囡囡去了太古城中心，一出地鐵就已經連接商場，行行吓，抬頭一望，好大好大條吹氣彩色毛毛蟲呀。有小朋友的家庭都會一眼認得，呢條咁鮮豔的毛蟲，咪係幼稚園小朋友必睇的《The Very Hungry Caterpillar》！

望到呢個裝飾，就諗到今次活動一定係同繪本、圖書有關。原來，呢本經典繪本童書，出版五十週年，太古心中心特別舉行「World of Eric Carle 童心童閱」，以呢本書的著名繪本大師 Eric Carle 其中三本作品為主題，設立三個玩樂區。

《10 Little Rubber Duck》故事講述小鴨嘅海上冒險。小朋友進入暗暗的場區內，以手電筒周圍照，會照出海洋中同陸地上唔同的動物。

小鴨探險區隔離，係幾幅大大的深藍佈景，有月亮、小屋、吊著滿天星星，呢個係《PaPa, Please Get the Moon for Me》繪本中嘅插畫，企係度影相，就好似置身係故事書之中。

第三個，就係《The Very Hungry Caterpillar》，全球最受歡迎著作，其遊戲區亦正是小朋友最喜歡的巨型滑梯。而週末假日下午時間，仲有機會見到兩米高嘅毛毛蟲出現於商場，大家快 d 來野生捕穫啦。

展區旁邊，係誠品書店專賣區，有 Eric Carle多本繪本圖書，同埋造型商品。誠品書店仲安排多場工作坊及家長故事學堂，有興趣的可以參考呢個日程表。

商場較早前進行了親子講故事比賽招募，參賽者要將指定故事情節演繹，拍成2分鐘片段。最後選10位參賽者參與 9月15日的決賽，競逐豐富獎品。錯過報名的各位，都唔緊要的，參考一下其他參賽者的演繹，都可以互相學習。

我兩個小朋友，從小都係由閱讀繪本開始，畢竟小朋友都喜歡看豐富的圖畫，看圖可以引發幻想力，由最初期，引導佢哋看圖講故事，慢慢再教讀文字，就自然會培養出閱讀的興趣同習慣。

【活動詳情】

日期: 8月16日至9月15日

時間: 11am~9pm

地點: 太古城中心二期中庭 及 中橋