早排，哥哥同妹妹測完驗，為咗獎勵一下佢哋咁勤力溫書，我就帶佢哋上 Sky100 玩。
第一次上 Sky100，哥哥同妹妹都好興奮呀，連我自己都好期待上去飽覽香港景色。1分鐘極速上到 393米，360度全景一覽無遺。
除咗上去睇靚景，原來上面有間 Café 100 by The Ritz-Carlton 餐廳，一排 bar 檯對住大大塊落地玻璃，光猛又開揚。見環境咁好，一於坐底食睇下有咩好嘢食。
下個月就聖誕節，Café 100 推出「聖誕下午茶 Christmas Afternoon Tea Set」，緊係要率先試下先啦！
Tea Set 架共有四層，頂層係黑森林蛋糕杯，紅色朱古力底下，係香濃雲尼拿忌廉，加上啖啖黑朱古力碎及慕絲，最底就混入少少酒味，同朱古力真係極襯。
第三層係紅豆芝士蛋糕及綠茶紅桑子朱古力杯。紅豆芝士味微甜，入口好滑，芝士蛋糕中混有粒粒紅豆，更加有口感。
綠茶紅桑子朱古力杯，淡淡綠茶味中，帶有紅桑子嘅酸咪咪，而身為朱古力控嘅我，當然最鍾意就係個「杯」。
第二層有三款咸點，食完上面兩層甜點，正好可以中和一下。煙火雞小紅莓三文治，麵包軟熟，火雞肉夾住紅莓果醬，酸酸甜甜非常開胃。
烤南瓜忌廉芝士南瓜子餡餅，餡餅皮幾酥化，中間係南瓜味嘅 cream cheese，所以咸得黎又有南瓜嘅少甜。
三文魚醬醃製紅菜頭黑麥麵包，我個人幾喜歡呢款咸點，麵包底幾有咬口。而粉紅色嘅以為係忌廉，竟然係紅菜頭加三文魚醬整成的，加埋上面幾粒三文魚籽，咸咸地，好特別。
Tea Set 最底層就係我嘅至愛…..英式鬆餅配果醬及奶油忌廉，鬆軟得來，又唔會散碎，而佢嘅靈魂在於幼滑嘅 clotted cream，加上清甜嘅果醬，實在太好味喇！
另外，肉桂蕃薯配火腿及羊奶芝士迷你泡芙亦唔錯，甜嘅泡芙就食得多，好少食咸味嘅，估唔到呢個配搭都好好食，泡芙外皮薄薄的，入面嘅餡料又滑又香。
一個二人 Tea Set 配兩杯飲品，我哋叫咗 Café 100 泡沫咖啡，及薄荷茶。
碰巧當日天氣唔錯，港九新界美景盡入眼簾，一邊嘆美點、一邊欣賞美景，頓時變得心曠神怡，煩惱盡消。坐坐下，就坐到夜晚，睇埋夜景先捨得走。
No comments:
Post a Comment